‎လူသားမျိုးနွယ်စုများနှင့် ဗီဇအနီးစပ်ဆုံးဖြစ်ပြီး အလွန်ဉာဏ်ရည်ထက်မြက်ကြတဲ့ အမြှီးမပါသည့် မျောက်ဝံ (Ape) မျိုးနွယ်စုဝင်... မလေးဘာသာစကားအရ "သဘာဝတောတွင်းလူသားကြီးများ" ဟု အဓိပ္ပာယ်ရတဲ့ "လူဝံ" (Bornean Orangutan) စုံတွဲလေး ရန်ကုန်တိရစ္ဆာန်ဥယျာဉ်သို့ ရောက်ရှိလို့နေပါပြီ။ 

‎ဒီမျိုးစိတ်ဟာဆိုရင် လက်ရှိ သဘာဝတောတွင်းမှာ မျိုးသုဉ်းရန် အန္တရာယ်နှင့် အလွန်နီးကပ်နေသည့် (Critically Endangered Species) စာရင်းဝင် ရှားပါးတိရစ္ဆာန်လည်း ဖြစ်ပါတယ်။

‎ရန်ကုန်တိရစ္ဆာန်ဥယျာဉ်မှာ လူဝံများကို လွန်ခဲ့တဲ့ နှစ်ပေါင်း (၄၀) ခန့်ကပင် နောက်ဆုံးပြသခဲ့ဖူးတာမို့ အခုတစ်ခေါက်မှာတော့ ချစ်စရာကောင်းလှတဲ့ လူဝံအထီးလေး (လီယို) နှင့် အမလေး (ပင်ကီ) တို့ကို ပြန်လည်တွေ့ဆုံခွင့်ရရှိမှာက တကယ့်ကို စိတ်လှုပ်ရှားစရာ သတင်းကောင်းတစ်ခုပဲ ဖြစ်ပါတယ်။ 

‎လူဝံမျိုးစိတ်များကို အရှေ့တောင်အာရှရှိ ဆူးမားတြားနှင့်ဘော်နီယိုကျွန်းဆွယ်များမှာ တွေ့ရှိနိုင်ပါတယ်။ ချစ်စရာကောင်းလှတဲ့ လူဝံ လေးတွေဟာ သဘာဝတောထဲတွင် သစ်ပင်အမြင့်ကြီးများပေါ်၌ အသိုက်ဆောက်ကာ နေထိုင်လေ့ရှိပြီး မိမိတို့၏ ရှည်လျားသန်မာသော လက်များကို အသုံးပြု၍ တစ်ပင်မှတစ်ပင် ကူးသန်းသွားလာတတ်ပါသည်။ထို့အပြင် ပြဿနာများကို ကိုယ်တိုင်ဖြေရှင်းနိုင်ပြီး အသုံးအဆောင်ပစ္စည်းများကိုပါ ကိုင်တွယ်အသုံးပြုနိုင်လောက်အောင် ဉာဏ်ရည်မြင့်မားလှပါတယ်။ 

‎ထိုကဲ့သို့ ချစ်စရာကောင်းသော အပြုအမူနှင့် လှုပ်ရှားမှုဟန်ပန်များရှိသော လူဝံအထီးလေး (လီယို) နှင့် အမလေး (ပင်ကီ) တို့ကို ကိုယ်တိုင်ကိုယ်ကျ လာရောက်ကြည့်ရှုလေ့လာနိုင်ဖို့ တိရစ္ဆာန်ဥယျာဉ်(ရန်ကုန်) ကို လာခဲ့ဖို့ဖိတ်ခေါ်လိုက်ပါတယ်ရှင်။